Ինչպես կազմել բիզնես պլան և սկսել բիզնեսը

Նախքան բիզնես գաղափարը բիզնեսի վերածելը և սեփական բիզնեսը սկսելը, անհրաժեշտ է ունենալ բիզնես պլան։ Բիզնես պլանն ամփոփ նկարագիր է ընկերության բոլոր կարճաժամկետ և երկարաժամկետ նպատակների և դրանց իրագործման ուղիների վերաբերյալ։ Բիզնես պլանի կազմումը կարևոր է համարվում արդյունավետ գործունեության համար, քանի որ ավելի է պարզեցնում բարդ թվացող գործընթացը՝ ներկայացնելով այն 9 փուլերի միջոցով։

Բիզնես սկսելն առաջին հայացքից կարող է բարդ թվալ, քանի որ բացի ֆինանսական ներդրումներից հարկավոր են մասնագիտական մոտեցումներ։ Համաձայն Investopedia-ի բիզնեսների 67%-ը ձախողում է առաջին 5 տարում։ Ձախողման պատճառները տարբեր են՝ հիմնականում կախված տեսլականի բացակայությամբ: Տվյալ պարագայում կարևոր է դիմել մասնագիտական խորհրդատվության բիզնեսի ճիշտ պլանավորման ժամանակ:

Բիզնես պլանի հիմնական սկզբունքները

Ինչպես ցանկացած գործում, այնպես էլ բիզնես սկսելուց առաջ ամենակարևոր պայմանը պահանջարկի և առաջարկի ճշգրիտ գնահատումն է և հաճախորդների կարիքների բացահայտումը, հետևաբար հիմնական սկբունքներն են շուկայի մանրամասն ուսումնասիրությունը և ֆինանսական պլանի կազմումը։

• Հիմնվեք հետազոտական և իրատեսական տվյալների բազայի վրա

Եղեք ավելի իրատես, քան իդեալիստ․ շատ հաճախ բիզնես պլանները չափազանց շատ են կենտրոնանում այն բանի վրա, թե ինչպիսին կարող է լինել ապրանքը կամ ծառայությունը, այլ ոչ թե ինչպիսին է այն իրականում: Թեև տեսլական ունենալը կարևոր է, Ձեր ծրագիրը պետք է հիմնված լինի հետազոտական տվյալների վրա, քանի որ այս փուլն առանցքային նշանակություն կարող է ունենալ հետագա գործունեության համար, այս հարցում ցանկալի է խորհրդակցել փորձառու մասնագետների հետ։

• Գրանցեք բիզնեսն ու ընտրեք ճիշտ կազմակերպաիրավական տեսակ

Օրինականացրեք Ձեր բիզնես գաղափարը. դրանով դուք խուսափում եք ժամանակ կամ գումար կորցնելուց՝ թողնելով գաղափարը թղթի վրա։ Բիզնեսի առցանց գրանցումն հասանելի է e-register.am-ի միջոցով։ Նախ և առաջ պետք է գրանցվել կայքում, ինչպես նաև ունենալ էլէկտրոնային ստորագրություն, քանի որ փուլերից մեկում պահանջվելու է։ Գրանցվելուց հետո առաջին քայլը նոր ընկերության կազմակերպաիրավական տեսակի ընտրությունն է, քանի որ կազմակերպաիրավական տեսակն է որոշում հետագա պարտավորությունները։

Բիզնես պլանի փուլերը

Իհարկե, բիզնեսի կարիքները միշտ փոխվում են, բայց Ձեր բիզնես ծրագիրը պետք է հստակ պատկերացում տա, թե ինչպես բիզնեսը կաշխատի կարճ և երկարաժամկետ հեռանկարում: Բիզնես ծրագրի կազմումը կօգնի հետագա բիզնես կառավարման գործում։

Բիզնես պլանը պետք է հստակ արտացոլի, թե ինչպես և ինչ միջոցներով եք հասնելու բիզնեսի առջև դրված նպատակներին, լուծելու բոլոր խնդիրները և հստակ արտացոլի Ձեր գործողությունների պլանը։ Այս ամենի ամփոփ նկարագիրը տրվում է 9 փուլերի միջոցով`

1. Համառոտ նկարագիր

Այս բաժնում արտացոլվում է կազմակերպության առաքելությունը, տեսլականը և արժեքները, որոնց վրա կառուցված է ընկերությունը և հաջողության հասնելու ուղին, արտացոլվում են ընկերության նպատակներ և գործողության պլանները։ Նաև պետք է ներառել առաջարկվող ապրանքի կամ ծառայության մասին համառոտ նկարագիրը և իրացման ուղիները։

2. Բիզնես մոդել

Բիզնես մոդել բաժնում ներկայացվում է ընկերության բիզնես գաղափարը, շահույթ ստանալու ծրագիրը և գործունեության ոլորտը: Սահմանվում է ապրանքների կամ ծառայությունների շարքը, որոնք բիզնեսը նախատեսում է վաճառել, և դրան համապատասխան թիրախային շուկան և սպասվող ցանկացած ծախս: Բիզնես մոդելները կարևոր են ինչպես նոր, այնպես էլ կայացած բիզնեսների համար:

3. Ապրանքներ/ծառայություններ

Այստեղ տրամադրվում է տեղեկատվություն վաճառվող ապրանք/ծառայության վերաբերյալ, օրինակ՝ ինչ եք վաճառում, ինչ օգուտ են ստանում հաճախորդները, որքան է ապրանքի կյանքի ցիկլի տևողությունը: Ձեր ապրանքը կամ ծառայությունը Ձեր բիզնես գաղափարի առանցքն է, այս բաժինը օգտագործվում է մանրամասնելու Ձեր արտադրանքը կամ ծառայությունն իր կյանքի ցիկլի ընթացքում, ներառյալ՝ ում համար է նախատեսված, ինչ արժե և ինչ մրցակցային առավելություն ունի:

4. Շուկայի և մրցակիցների վերլուծություն

Շուկայի մանրակրկիտ հետազոտությունների անցկացումը կարող է օգնել Ձեզ հասկանալ Ձեր ոլորտի էությունը, ինչպես նաև այն, թե ինչպես առանձնանալ մրցակիցներից: Այստեղ ներկայացվում է շուկայի նկարագրությունը, զարգացման միտումները, ակնկալվող վաճառքի ծավալները, թիրախային շուկայի նկարագիրը և կարիքները:

5. Աճի ռազմավարություն և իրականացման պլան

Բիզնես պլանի այս բաժինը սահմանում է կազմակերպության ռազմավարությունը, զարգացման ուղիները, ղեկավար օղակի պարտականությունները։ Գործողությունների ծրագիրը բացատրում է, թե ինչպես եք գործելու և կառավարելու Ձեր բիզնեսը: Այն նաև անդրադառնում է բիզնեսի այն գործունեությանը, որն ուղղակիորեն չի առնչվում հաճախորդներին ապրանքներ կամ ծառայություններ մատուցելուն:

6. Կազմակերպում և կառավարում

Կազմակերպում և կառավարում բաժնում ներկայացվում է բիզնեսի կազմակերպաիրավական կառուցվածքը և դրանից բխող կառավարման նկարագիրը: Մանրամասն նկարագրվում են անհրաժեշտ մարդկային ռեսուրսները և որակավորման պահանջները։ Այս բաժինը պետք է ներառի համապատասխան տեղեկատվություն Ձեր ղեկավար թիմի և այլ հիմնական աշխատակիցների մասին, ներառյալ յուրաքանչյուր համապատասխան անհատի սեփականության տոկոսը և ներգրավվածության աստիճանը՝ կախված կազմակերպաիրավական տեսակից:

7. Իրականացման պլան

Իրականացման պլանը ներառում է բիզնեսի տեղակայման վայրը, սարքավորումները, անհրաժեշտ մասնագետների փորձը, ապրանքանյութական պաշարների պահանջները և մատակարարները, արտադրական գործընթացի նկարագրությունը, ինչպես նաև ցանկացած այլ ահրաժեշտ մանրամասներ: Բիզնեսի համար իրականացման պլանը վճռորոշ դեր է խաղում գաղափարի, նախագծի կամ մեթոդաբանության մշակման և իրականացման գործում:

8. Մարքեթինգային ռազմավարություն

Այս բաժինը ներառում է վաճառքի ռազմավարություն, գնագոյացման քաղաքականություն, ինչպես նաև ապրանքների ու ծառայությունների առաջմղման ծրագիրը տարբեր աղբյուրներով: Մարքեթինգի և վաճառքի պլանները հստակեցնում են այն քայլերը, որոնք ձեր բիզնեսը կձեռնարկի իր ֆինանսական և վաճառքի նպատակներին հասնելու համար:

9. Ֆինանսական վերլուծություն

Ֆինանսական վերլուծություն բաժնում ներկայացնում է դրամական հոսքերի մասին հաշվետվություն, ֆինանսական կանխատեսումներ, անվնասաբերության կետի հաշվարկման վերլուծություններ։ Այս փուլի նպատակն է բիզնեսի կենսունակության ցուցադրումը և ներդրումային գրավպչությունը Այս հատվածը թերևս ամենաառանցքայինն է և անհրաժեշտ է խորրդակցել փորձառու մասնագետների հետ։

Ի՞նչ առավելություներ կտա բիզնես պլանը

Ըստ էության, բիզնես պլանը մանրամասն նկարագրում է բիզնեսը, ներառյալ դրա նպատակները: Նախևառաջ պետք է հասկանալ բիզնես պլանի կարևորությունը, որպեսզի կազմել ճիշտ բիզնես պլան։ Ստորև թվարկված են բիզնես պլան ունենալու առավելությունները՝

Ընկերության նպատակների և խնդիրների սահմանում

Սահմանվում են նպատակները և դրանց հասնելու ուղիները՝ մշակված գործողությունների պլանին համապատասխան։ Սահմանվում են ռազմավարական , երկարաժամկետ ու կարճաժամկետ նպատակները, որի միջոցով ավելի հեշտ է լինում ստուգել գործունեության պլանի կատարողականությունը, այսինքն՝ ինչքանով ենք մոտ մեր առջև դրված նպատակների իրականացմանը։

Ներկա իրավիճակի գնահատում և բացթողումների վերհանում

Քանի որ արդեն հստակ բաժանում կա իրականացվող գործողությունների վերաբերյալ, սահմանվում են կատարողականի ցուցանիշներ և նորմաներ, որը հնարավորություն է տալիս գնահատել ներկա իրավիճակը և հասկանալ խոչընդոտող հանգամանքները, հասկանալ՝ ինչքանով ենք իրականացնում մեր առջև դրված պլանը։ Թերևս ամենակարևոր հատկանիշներից է նաև այն, որ հստակ տեսանելի են դառնում ընկերության ձեռքբերումները և դրան տարած ուղիները։

Ֆինանսական աղբյուրների ներգրավում

Բացի բիզնեսի անմիջական մասնակիցներից, բիզնես պլանն առաջնային աղբյուր է ներդրողների համար, և բիզնեսերի մեծամասնության համար բիզնես պլանի հիմնական շահառուները հենց ներդրողներն են։ Բիզնես պլանը պատասխանում է այն հարցին, թե ինչ միջոցներ է պետք ներդնել տվյալ ծրագրի ապահովման համար, ինչ եկամտաբերության մակարդակ կապահովվի և ինչ ռեսուրսներ կպահանջվեն, ըստ դրա ներդրողները կորոշեն՝ արդյոք արժե միջոցներ ներդնել տվյալ ներդրումային նախագծի մեջ

Բիզնես պլանի օրինակ

Ներբեռնեք և օգտագործեք Ձեր նոր ընկերությունը կառուցելու համար բիզնես պլանի ձևանմուշը :

Հարկավոր է հասկանալ բիզնես պլանի հիմնական տարրերը, որոնք պետք է ծառայեն որպես հիմք: Հիմնականում բիզնես պլանը պետք է պատասխանի երկու հարցի՝ ինչո՞ւ Ձեր բիզնեսը և ինչո՞ւ հիմա:

Ներդրողները ցանկանում են իմանալ, թե ինչու է Ձեր բիզնեսը մտնում շուկա, այսինքն՝ ինչ խնդիր է այն լուծում և ինչով է տարբերվում ներկայիս գործող բիզնեսներից: Նրանք նաև ցանկանում են իմանալ, թե ինչու է այժմ ճիշտ ժամանակը տվյալ տեսակի ապրանքի կամ ծառայության համար:

Այնուամենայնիվ, կախված գործունեության բնագավառից և բիզնեսի նպատակներից՝ բիզնես պլանի պահանջները փոփոխվում են, ուստի անհրաժեշտ է դիմել մասնագիտական խորհրդատվության և հասկանալ Ձեր բիզնեսի առանձնահատկությունները։